ናይ ትግርኛ መጽሓፍ ቅዱስ ብዘመናዊ ቴክኖሎጂ

 

¹⁸ እምበኣር ነዚ ቓላተይ እዚ ኣብ ልብኹምን ኣብ ነፍስኹምን ኣንብርዎ፡ ንምልክት ከኣ ኣብ ኣእዳውኩም እሰርዎ፡ ኣብ መንጎ ኣዒንትኹም ድማ ክታብ ይኹን።¹⁹ ኣብ ቤትካ ኾፍ ምስ በልካን ኣብ መገዲ ኽትከይድ ከሎኻ ናብ በጥ ምባልካን፡ ኣብ ምትንሳእካን ብእኡ እናተዛረብኩም፡ ንደቅኹም ምሃርዎም። ²⁰ ኣብ ልዳት ቤትካን ኣብ ማዕጾኻን ከኣ ጽሓፎ። ዘዳግም 11፡18-20

 

መጽሓፍ ቅዱስ ብዝተፈላለየ ቋንቋታት ኣብ ዝተፈላለየ እዋናት ብዝተፈላለየ መገዲ ኣብ ዝተፈላለየ ጽፍሕታት ተሓቲሙን ይሕተምን ኣሎ። ኣብ ኤርትራ ከኣ ብደረጃ ማሕበረ መጽሓፍ ቅዱስ ብሚስዮናውያን ብ1965 ናብ ትግርኛ ተተርጉሙን ተሓቲሙን። ከምኡ ውን ናይ ሓድሽ ኪዳን ብሓድሽ ትርጉምን ሓድሽ ትርጉም ዝሓዘ ምሉእ መጽሓፍ ቅዱስ ኣብዘን ዝሓለፋ ውሑዳት ዓመታት ተሓቲሙ እዩ። መጽሓፍ ቅዱስ ብሉይ ኪዳንን ሓዲስ ኪዳንን ተባሂሉ ከኣ ኣብ ክልተ ክፍሊ ይኽፈል። ኣብ ኤርትራ ዘለዋ ቤተክርስትያናት ዝተፈለለየ ኣቆጻጽራ መገዲ ኣለወን ኦርቶዶክስ ቤ.ክ. 81 መጻሕፍቲ ትቈጽር ፡ ካቶሊካዊት ቤተክርስትያን 73 መጻሕፍቲ ትቈጽር፡ ወንጌላዋያን ከኣ 66 ይቖጽሩ።

 

ደሃይ ወንጌል ከኣ ካብዚ ተበጊሳ መጽሓፍ ቅዱስ ብትግርኛ ብዝተፈላለየ መገዲ (ንኣብነት CD, Internet) ምዝርጋሕን ነገልገልቲ ናይቲ ህያው ኣምላኽ ብትግርኛ ንክጽሕፍዎ ዝደልዩ ጽሑፋት ብቐሊሉ ምድላውን ብዝብል ሓሳብ መጽሓፍ ቅዱስ ብትግርኛ ዲጂታል (digital) ንምጽሓፍ ትዳሎ ኣላ።

 

ስለምንታይ ግን ደሃይ ወንጌል?

 

ኣብዚ እዋን ብትግርኛ ዲጂታል (digital) እተጻሕፈ ጽሑፍ ብወገንና ክንረክብ ኣይከኣልናን። ኣብ ብዙሕ ደሊናን ንብዙሓት ሓቲትና ኣብ ኢንተርነት ውን ክንረክብ ስለዘይከኣልና ናብዚ ናይ መጽሓፍ ቅዱስ ብትግርኛ ዲጂታል (digital) ምጽሓፍ ክንወድቕ መሪጽና። እዚ ማለት ናይ ትግርኛ መጽሓፍ ቅዱስ ብኮምፕዩተር ንኽጽሓፍ ብዝብል ሓሳብ ተበጊስና ኣለና። ደሃይ ወንጌል ኣብዚ ፍሉይ ዕዮ ንዝኾነ ብማሐበር መጽሓፍ ቅዱስ ዝድለ ጠለባት ከተዳሉ ድልውቲ ምዃና በዚ ኣጋጣሚ ክትሕብር ትፈቱ።   

 

ዕዮ ምክፋል

 

ደሃይ ወንጌል ኣብዚ ናይ መጽሓፍ ቅዱስ ብትግርኛ ዲጂታል (digitalize) መስርሕ ፍሉይ ዝተመደበ ባጀት ስለዘይብላ ፡ ንኩሉኹም ሕዝበ ክርስትያን፡ ኣብዚ ቅዱስ ዕዮ ተወፊኹም ክትሳተፉ እትደልዩ ካብዚ ኣብ ታሕቲ ተዘርዚሩ ዘሎ ቅዱሳት መጻሕፍቲ እተን ትኽእልወን ከተወፍዩ በቲ ኣብ መስቀል እተሰቕለ ጐይታናን መድሓኒናን የሱስ ክርስቶስ ንዕድመኩም። ኣዝዩ ሰፊሕ ዕዮ ስለዝኾነ ግዜ ናይ ብዙሓት ሰባት ክሓትት እዩ። ስለዚ ኩሉ እቲ ኣብ ኮምፕዩተር ምሉእ መጽሓፍ ክጽሕፍ ዝኽእል ከምኡውን እቲ ሓንቲ ምዕራፍ ክጽሕፍ ዝኽእል ናይ ዕዮ ምድንጋራት ምእንቲ ከይፍጠር እተን ክትጽሕፍወን እትኽእሉ ቅድሚ ምጅማርኩም ብኢመይል ኣብ ክትሕብሩና ንሓተኩም።

 

 

መጽሓፍ ቅዱስ

 

 

ብሉይ ኪዳን